阿奴新贊助送褸兼泵水 雲格順晒

呢幾年雲格帶隊，最激心莫過於見到禾確特底線傳底、艾朗藍斯自轉後回傳、路斯基傷完又傷、基奧特射親都上看台，同埋自己件褸條拉鏈拉極都拉唔上去！頭4個問題已經喺今季得到改善，而最後一個問題，嚟到今日亦終於可以解決嘞！

[b]有億鎊贊助費買人[/b]
阿仙奴下季會換波衫贊助商，同PUMA簽下5年肥約，贊助費係以前3倍有多，雲格嚟緊大把轉會費使嘞；但最令佢感動嘅，可能係佢終於唔使再着住嗰件永遠都拉唔到拉鏈嘅大褸嘞！近年每逢阿仙奴賽後，總見球迷將雲格拉唔到拉鏈嘅片放上網，將佢個尷尬樣引為笑柄；唉，俾球迷笑吓事小，佢老人家都64歲，冷親就唔好啦。有廠迷好關心雲格嘅健康，喺twitter度呼籲新贊助商幫雲格換過件拉鏈暢順啲嘅褸。PUMA就即刻回應：「放心！呢樣係我哋首要做嘅事！」
除咗換褸呢啲小事，令到阿仙奴拋棄合作咗成廿年嘅「一剔」，原因都係錢作怪！𠵱家「一剔」一年畀阿仙奴約900萬鎊贊助費，但由下季起嘅5年，PUMA會畀阿仙奴1.5億鎊（約19億港元），除番每年袋3,000萬鎊，係𠵱家嘅3倍多。呢份係阿仙奴史上最重磅嘅贊助合約，亦係英超最豐厚嘅體育用品贊助。球會賺多咗，雲格份預算亦鬆動好多，英國《每日鏡報》指，雲格𠵱家有1億鎊喺手等買人，真係買多兩個奧斯爾都有剩。

[b]傾掂數繼續做廠長[/b]
有新褸着之餘又有大把錢使，雲格已經決定續約；阿仙奴行政總裁加沙迪斯話：「雲格會同我哋續約，球會會喺適當嘅時候宣佈。我哋已經唔再擔心呢件事，因為雲格決定繼續貢獻球會，我哋亦一如既往咁支持佢。」
正如「一剔」想C朗返曼聯、「三間」想美斯去拜仁一樣，PUMA都會想自己贊助嘅球星去返佢贊助嘅球隊。轉咗贊助商，唔知會唔會幫到阿仙奴收購馬高列奧斯、巴洛迪利、法卡奧同耶耶托尼呢啲同一贊助商嘅球星呢？

[img]http://static.apple.nextmedia.com/images/apple-photos/apple/20140129/large/img0000012_aa05.gif[/img]


來源:蘋果日報網站