剃「蘇」戰弗爆　朗尼明落莫帥面

[img]http://static.apple.nextmedia.com/images/apple-photos/video/20130816/org/1376596249_a4e2.jpg[/img]

我求大俠覺得鶴臣同莫耶斯應該有啲牙齒印，雖然曼聯主帥莫耶斯不斷話朗尼唔夠狀態，但英格蘭領隊鶴臣就不留情面，喺周三對蘇格蘭嘅友賽畀朗尼踢咗大半場；朗尼亦明剃蘇格蘭籍主帥莫帥眼眉，落場表現生龍活虎。而英格蘭亦靠初次入選國家隊嘅列基林拔奠勝，喺主場以3:2擊敗蘇格蘭。

[img]http://static.apple.nextmedia.com/images/apple-photos/apple/20130816/large/img0000016_aa02.gif[/img]

[img]http://static.apple.nextmedia.com/images/apple-photos/apple/20130816/large/16s2-406p.jpg[/img]
■林拔（白衫）接應巴尼斯的角球，頭槌破網，助英格蘭主場3:2險勝蘇格蘭。路透社

[b]莫帥講波尷尬[/b]
周日曼聯以2:0贏韋根捧走社區盾，莫耶斯冇派朗尼上陣，佢解釋話朗尼肩傷初癒，狀態唔夠；不過外界認為朗尼鬧轉會，係莫帥搵藉口雪佢。周三英格蘭對蘇格蘭嘅友賽，鶴臣幫朗尼出頭，搵佢踢正選。最好笑嘅係，有英國電視台搵咗莫耶斯做嘉賓講波，當畫面顯示朗尼正選嗰陣，其他主持仲即刻抽水，問莫帥點睇；莫帥尷尬咁話：「其實，每個人都希望見到朗尼踢得好，佢都需要比賽。」曼聯喺英超首5輪就要對車路士、利物浦同埋曼城，莫耶斯亦表示非常唔滿意，話賽程「難到難以致信」。

[b]鶴臣幫口暗寸[/b]
呢場英格蘭都贏得辛苦，先俾蘇格蘭嘅占士摩利臣開紀錄，之後英軍靠禾確特追平。換邊後，加利卡希爾守唔住蘇軍射手堅尼米拿，被後者射入；好在韋碧克同列基林拔之後各建一功，幫英格蘭反勝3:2。
雖然朗尼冇入波同助攻，但踢到67分鐘先被換走，而且全場跑動積極，唔似傷完冇耐，莫耶斯已經冇晒面，但鶴臣賽後仲要「鞭屍」：「正常情況之下，我唔會期望一個季前未踢過比賽嘅人，喺呢場8月中嘅友賽上陣，但我要歸功莫耶斯同曼聯嘅團隊，佢哋訓練做得好好。」周四，有記者似乎嫌莫耶斯唔夠瘀，再問佢點睇朗尼生生猛猛幫國家隊比賽；莫帥先強調朗尼係非賣品，仲扮驚喜：「我噚晚都有睇，佢滿場飛，但呢場只係佢今季首場正式比賽。」
另外，效力修咸頓嘅林拔後備入替朗尼，31歲人首次為國披甲，就幫球隊頂入致勝球。林拔話自己夢想成真，而鶴臣都好滿意佢嘅表現，考慮之後繼續召佢踢世盃外。


來源:蘋果日報網站