美斯偷食照入波　同尼馬有你冇我

[img]http://static.apple.nextmedia.com/images/apple-photos/video/20130801/org/1375301286_7765.jpg[/img]

今夏最矚目嘅收購之一尼馬終於隆重登場，但佢嘅巴塞隆拿「地標戰」冇咩特別，一來佢只係後備上陣，踢得十幾分鐘，二來佢亦未有機會同美斯同場作戰，球迷仲未見到南美球王同世界球王嘅火花，最多只睇到佢兩個齊齊步出球場。呢場周二舉行嘅友賽，巴塞靠沙治奧羅拔圖同美斯各入一球，逼和波蘭球隊格但斯克2:2。
呢場比賽原定7月20號舉行，但因為巴塞前教練維蘭路華癌症復發，所以推遲到周二先踢。不過，主隊方面就開出條件，要求尼馬一定要上陣；喺商業因素下，周一先復操嘅尼馬焗住做後備。巴塞上半場派出多名主力，包括阿歷斯山齊士、基斯甸泰路同埋受偷食傳聞困擾嘅美斯。巴塞呢場都繼續燒鬚，15分鐘就先失波，好在沙治奧羅拔圖追平，半場踢成1:1。喺碧基同佩奧爾等主將缺陣下，巴塞條防線真係慌失失，換邊後又再失波；好在，巴塞仲有球王美斯！

[img]http://static.apple.nextmedia.com/images/apple-photos/apple/20130801/large/img0001172_aa05.gif/img]

[img]http://static.apple.nextmedia.com/images/apple-photos/apple/20130801/large/01s5-313p.jpg[/img]
■想睇尼馬（中）同美斯拍檔，球迷可能要等多陣；巴塞周五會對山度士。路透社

[b]美斯幫巴塞和2:2[/b]
雖然有阿根廷雜誌影到美斯早前喺拉斯維加斯食金髮美女波餅，但佢冇受影響，頭頂掂腳踢更勁，喺57分鐘突破越位，幫巴塞追成2:2，挽回番少少面子。巴塞喺下半場試陣陸續換入小將，美斯亦喺76分鐘被換出，球迷無緣睇到美斯同尼馬嘅合作咯！

[b]尼馬處子秀冇啖好食[/b]
睇咗大半場，尼馬喺後備席磨拳擦掌，好想落場。終於到79分鐘，身價值5,700萬歐元（約5.9億港元）嘅尼馬入替阿歷斯山齊士，首次為新球會上陣。不過喺呢十幾分鐘入面，尼馬未踢番之前洲際盃嘅水準；而格但斯克嘅防守球員亦似乎早有針對性策略，不斷夾擊尼馬，甚至出埋超技術，搞到佢冇啖好食。最終，尼馬幫唔到巴塞反勝，只能同格但斯克踢和2:2。
尼馬賽後除咗擦吓美斯鞋，仲話對手踢法硬朗，要啲時間適應歐洲足球嘅節奏：「我終於完成到夢想嘞！但波蘭呢隊波踢法都幾狠，加上我比賽前都係操咗一課，所以我要多啲時間去提升狀態。」

來源:蘋果日報網站